Maoir Thráchta
Réamhrá
Leagtar an fhreagracht as forfheidhmiú dlíthe mar a bhaineann siad le páirceáil mhídhleathach agus le stopadh feithiclí ar bhóithre poiblí ar mhaoir thráchta agus ar an nGarda Síochána. Fostaíonn údaráis áitiúla maoir thráchta chun monatóireacht a dhéanamh ar chásanna de na cionta sin ina gceantair.
Is féidir fíneálacha muirir sheasta idir €40 agus €200 do na cionta seo a eisiúint duit.
Ticéid pháirceála agus fíneálacha muirir sheasta
Cuirtear srian ar pháirceáil in áiteanna áirithe. Mar shampla, bíonn an chumhacht ag údaráis áitiúla i mbailte agus i gcathracha áirithe cosc a chur ar pháirceáil ag amanna ar leith agus in áiteanna ar leith. Tugtar na srianta páirceála seo le fios go soiléir ar fhógraí ar thaobh an bhóthair.
Is féidir le maor tráchta ticéad páirceála a eisiúint duit. Luafar ar an bhfoirm seo go ndearna tú cion agus luafar dáta, am agus láthair an chiona agus sonrófar air cláruimhir d’fheithicle.
Fíneálacha muirir sheasta
Idir €40 agus €200 a bhíonn fíneálacha muirir sheasta a ghearrtar ar chionta páirceála.
Má thug maor tráchta ticéad páirceála duit nó má chuir maor tráchta in iúl duit go ndearna tú cion, tugtar 28 lá duit dar tús dháta an fhógra chun an fhíneáil a íoc.
Murar íocadh é laistigh de 28 lá, méadaítear an fhíneáil faoi 50% agus murar íocadh é go fóill i ndiaidh 28 lá ina dhiaidh sin, cuirtear tús le himeachtaí cúirte.
Is cion é ticéad páirceála a bhaint nó cur isteach ar thicéad a cuireadh ar fheithicil duine eile. Má dhéanann tú seo, d’fhéadfaí fíneáil a ghearradh ort.
Tá aon duine a chuireann bac ar mhaor tráchta atá ag gníomhú i gcaitheamh dá ndualgais a chomhlíonadh ciontach i gcion agus dlífear fíneáil a ghearradh orthu ar é nó í a chiontú go hachomair.
Is féidir le maoir thráchta d’ainm agus do sheoladh a iarraidh nó a éileamh. Caithfidh siad aitheantas a iompar leo agus chun iad féin a shainaithint mar mhaoir thráchta. Is cion é má theipeann ort d’ainm agus do sheoladh a thabhairt nuair a éilítear duit agus d’fhéadfaí fíneáil ghearradh ort tar éis go ndéanfar thú a chiontú go hachomair.
Is féidir leat achoimre a fháil ar na cionta agus na fíneálacha muirir sheasta ar láithreán gréasáin an Údaráis um Shábháilteacht ar Bhóithre.
An dlí maidir le maoir thráchta
Is é an phríomhreachtaíocht a rialaíonn an limistéar seo an tAcht Údaráis Áitiúla (Maoir Thráchta), 1975, arna leasú. Is iad na hAchtanna um Thrácht ar Bhóithre 1961 go 2022 an bhunreachtaíocht maidir le cionta tráchta bóthair go ginearálta. Is iad na cionta ar féidir le maoir thráchta fíneálacha muirir sheasta a eisiúint dóibh cionta páirceála agus diosca mótarchánach, agus leagtar amach iad i Rialacháin an Achta um Údaráis Áitiúla (Maoir Thráchta), 1975 (Cionta Muirir Sheasta) (Leasú), 2022.