Cárta Páirceála Duine le Míchumas
Réamhrá
Is féidir leat iarratas a dhéanamh ar chead páirceála ionas go mbeifeá in ann páirceáil i spásanna páirceála do dhaoine faoi mhíchumas in Éirinn agus san AE más faoi mhíchumas i ngluaisteán thú nó má tá tú deimhnithe mar dhuine dall.
Tá an cead ar fáil más tiománaí nó paisinéir feithicle thú. Tá sé bailí ar feadh 2 bhliain ón dáta eisiúna.
Tá an scéim á reáchtáil in Éirinn ag Cumann Tiománaithe faoi Mhíchumas na hÉireann (DDAI) agus Cumann Cathaoireacha Rothaí na hÉireann (IWA).
Cosnaíonn sé €35 chun iarratas a dhéanamh agus is féidir iarratas a dhéanamh ar líne chuig an IWA nó chuig an DDAI. Cuirfidh siad roinnt ceisteanna ort le seiceáil an gcáilíonn tú agus seolfaidh siad foirm iarratais chugat trí ríomhphost nó sa phost.
Tugtar an Cárta nó an Cead Páirceála do Dhuine Faoi Mhíchumas agus Cárta Páirceála an AE do Dhaoine faoi mhíchumas ar an gcead páirceála.
Critéir Cháilitheachta
D’fhéadfaí iarratas a dhéanamh ar chárta más duine faoi mhíchumas i ngluaisteán thú nó má tá tú deimhnithe mar dhuine dall.
Beidh ceann amháin díobh seo a leanas ag teastáil uait:
- Bíodh deimhniú agat ó do liachleachtóir nó do chomhairleoir go gcomhlíonann tú na critéir leighis agus go bhfuil tú faoi mhíchumas i ngluaisteán.
- Bíodh Teastas Míochaine Príomhúla agat. Más ea, cáileoidh tú go huathoibríoch, ach beidh ort fós iarratas a dhéanamh ar an gcárta.
- Bíodh deimhnithe mar dhuine dall ag Comhairle Náisiúnta na nDall, Liachleachtóir Ginearálta, Oftailmeolaí nó Radharceolaí. Beidh ort fós iarratas a dhéanamh ar an gcárta.
Is féidir do cháilitheacht a sheiceáil ar shuíomh gréasáin Chumann Tiománaithe faoi Mhíchumas na hÉireann nó ar shuíomh gréasáin Chumann Cathaoireacha Rothaí na hÉireann.
Conas iarratas a dhéanamh ar Theastas Míochaine Príomhúil
Ní mór duit iarratas a dhéanamh ar an Teastas Míochaine Príomhúil trí d’Oifig Shláinte Áitiúil. Tá Cárta Leighis Príomhúil an-úsáideach toisc go bhféadfaí é a úsáid le haghaidh sochair eile a bhaineann leis, mar shampla, tú féin a dhíolmhú ó CBL, mótarcháin agus Cáin Chláraithe Feithicle a íoc.
Conas an cárta páirceála a úsáid
D’fhéadfaí an cárta a úsáid in aon fheithicil ina bhfuil tú ag taisteal, mar phaisinéir nó mar thiománaí. Ciallaíonn sé seo gur féidir leat an cárta a thabhairt leat agus é a thaispeáint san fheithicil ina bhfuil tú ag tiomáint nó ag taisteal.
Is féidir leat páirceáil i spásanna páirceála do dhaoine faoi mhíchumas. Tá siombail na cathaoireach rothaí péinteáilte ar an talamh ar na spásanna seo nó tá comhartha ar a bhfuil siombail ar taispeáint.
Conas do chárta páirceála a thaispeáint
Ní mór cárta bailí a bheith agat ar taispeáint ar ghaothscáth na feithicle chun spás páirceála do dhaoine faoi mhíchumas a úsáid. Taispeánfaidh an cárta do shíniú agus do ghrianghraf.
Ag taisteal thar lear
Is féidir an cárta a úsáid agus tú ag taisteal laistigh den AE. Bí cinnte do chárta a thabhairt leat.
Cuimhnigh go gcaithfidh tú géilleadh do na dlíthe agus na srianta gluaisteánaíochta ar pháirceáil agus tú ag taisteal thar lear. Tá foilseachán curtha le chéile ag Coimisiún an AE, Cárta Páirceála do dhaoine faoi mhíchumas san Aontas Eorpach.
Má tá tú ag taisteal lasmuigh den AE, ba cheart duit dul i dteagmháil le hambasáid na tíre sin.
Tá faisnéis maidir le húsáid an chárta pháirceála thar lear ar fáil sa Treoir Fédération Internationale de l’Automobile (FIA) don taistealaí faoi mhíchumas.
Cionta páirceála agus spásanna do dhaoine faoi mhíchumas
Is cion é feithicil a pháirceáil i spás páirceála do dhaoine faoi mhíchumas mura bhfuil cárta bailí agat. Má pháirceálann tú go neamhdhleathach i spás páirceála do dhaoine faoi mhíchumas, gheobhaidh tú fíneáil pháirceála de €150. Méadaíonn sé suas go dtí €225 mura n-íoctar é laistigh de 28 lá.
€200 (a mhéadófar aníos go €300 mura n-íocann tú laistigh de 28 lá) a bheidh i méid an mhuirir sheasta ón 1 Eanáir 2023.
Tá an chumhacht ag maoir tráchta agus baill den Gharda Síochána cárta páirceála a iarraidh agus a iniúchadh lena chinntiú nach bhfuiltear ag baint mí-úsáide as.
Conas athnuachan agus iarratas adhéanamh
Cuireann dhá eagraíocht an cárta ar fáil in Éirinn.
Is féidir iarratas a dhéanamh ar líne ar shuíomh gréasáin Chumann Cathaoireacha Rothaí na hÉireann, nó seol ríomhphost chuig maats@iwa.ie.
Is féidir iarratas a dhéanamh ar líne ar shuíomh gréasáin Chumann Tiománaithe faoi Mhíchumas nó ríomhphost a sheoladh chuig parkingcard@ddai.ie.
Cosnaíonn cárta páirceála €35. D’fhéadfaí coinneálaí gaothscátha a cheannach a chosnaíonn €2.
Beidh ort Garda a fháil ag stáisiún na nGardaí chun do ghrianghraf a aithint agus chun cuid de d’fhoirm iarratais a shíniú.
Cárta páirceála a athnuachan
Ní mór an cárta páirceála a athnuachan gach 2 bhliain. Gheobhaidh tú foirm athnuachana cúpla seachtain sula mbeidh do chárta páirceála le dul in éag. Mar sin, má athraíonn tú do sheoladh, ba chóir duit a rá leis an eagraíocht a thug an cárta duit.
Má tá obráid nó cóireáil ar bith faighte agat a d’fhéadfadh feabhas a chur ar do ghluaisteacht, ba cheart duit an t-eolas seo a chur san áireamh sa chuid gluaisteachta den fhoirm athnuachana.
Athsholáthar cárta páirceála atá caillte
Má chailleann tú nó má ghoidtear do chárta, déan iarratas chuig an eagraíocht a thug an cárta duit: Cumann Tiománaithe faoi Mhíchumas nó Cumann Cathaoireacha Rothaí na hÉireann. Beidh ort an táille chaighdeánach de €35 a íoc arís.