Seirbhísí fostaíochta do chuardaitheoirí poist

Is cuardaitheoir poist thú sna cásanna seo a leanas:

• Tá Liúntas Cuardaitheora Poist nó Sochar Cuardaitheora Poist á fháil agat
• Tá síniú á dhéanamh agat do chreidmheasanna dífhostaíochta
• Tá tú dífhostaithe, ach níl tú incháilithe íocaíocht leasa shóisialaigh a fháil
• Tá tú dífhostaithe, tá obair á cuardach agat agus tá íocaíocht leasa shóisialaigh á fáil agat

Mar chuardaitheoir poist, is féidir leat dul i dteagmháil le d’Ionad Intreo áitiúil le haghaidh tacaíochta fostaíochta, lena n-áirítear comhairle faoi obair a chuardach, eolas ar fholúntais, agus tacaíocht ioncaim.

Is gnách go dtugtar tús áite do dhaoine a bhfuil Sochar Cuardaitheora Poist nó Liúntas Cuardaitheora Poist á fháil acu chun tacaíochtaí fostaíochta a fháil.

Má tá íocaíocht cuardaitheora poist á fáil agat, b’fhéidir go mbeidh ort teacht ar na tacaíochtaí seo trí phróiseas gníomhachtaithe an RCS – féach ‘Íocaíochtaí cuardaitheora poist agus gníomhachtú’ thíos.

Tá an Deontas Tacaíochta Oiliúna (DTO) suas le €1,000 sa bhliain ar fáil do dhaoine ar íocaíochtaí nó scéimeanna cáilitheacha áirithe, lena n-áirítear an Clár Socrúcháin Taithí Oibre.

Maoiníonn sé rochtain thapa ar oiliúint ghearrthéarmach, lena n-áirítear cúrsaí suas go leibhéal 6 DCC agus an leibhéal sin san áireamh.

Is féidir leat DTO a fháil má fhaigheann do Chomhairleoir Pearsanta Fostaíochta nó Oide Poist amach nach féidir leat post a thosú gan:

• Scil láithreach a fháil
• Deimhniú nó cead a fháil nó a athnuachan.

Rialacha don DTO

I measc na rialacha chun an DTO a fháil, caithfidh an oiliúint a bheith:

• Gearrthéarmach
• Cuid de do phlean um dhul chun cinn pearsanta (PPP) comhaontaithe
• Nasctha le do riachtanais gníomhachtaithe (féach ‘Íocaíochtaí agus gníomhachtú cuardaitheora poist’ thíos)
• Níl sé ar fáil go díreach ón Roinn
• Níl sé ar fáil ó aon soláthraí stáit eile (cosúil le Boird Oideachais agus Oiliúna nó Teagasc).

Léigh tuilleadh faoi na rialacha chun an DTO a fháil ar Gov.ie.

Caithfidh tú iarratas a dhéanamh ar DTO trí do Chomhairleoir Pearsanta Fostaíochta nó d'Oide Poist.

Cosaint Idirnáisiúnta agus Cosaint Shealadach

Más iarratasóir ar Chosaint Idirnáisiúnta thú, nó má tháinig tú go hÉirinn ón Úcráin agus má tá íocaíocht sheachtainiúil á fáil agat do Thairbhithe na Cosanta Sealadacha, d’fhéadfaí tú a chur san áireamh don DTO.

Áirítear leis na seirbhísí agus tacaíochtaí:

Seisiún rannpháirtíochta grúpa le cuardaitheoirí poist eile le léargas ginearálta a thabhairt duit ar na tacaíochtaí atá ar fáil. Sanntar thú do sheisiún rannpháirtíochta grúpa nuair a shíníonn tú i dtosach chun íocaíocht cuardaitheora poist a fháil.

Nuair a chláraíonn tú le haghaidh íocaíochta cuardaitheora poist, caithfidh tú freastal ar seisiún rannpháirtíochta grúpa (pdf) le cuardaitheoirí poist eile. Ag an seisiún seo, gheobhaidh tú eolas ar na tacaíochtaí atá ar fáil chun cabhrú leat filleadh ar an obair.

Seisiúin aghaidh ar aghaidh le Intreo

Ag brath ar do chúinsí, is féidir go mbeidh tú sceidealaithe le freastal ar sheisiúin duine le duine le Comhairleoir Pearsanta Fostaíochta chun na nithe seo a leanas a phlé:

• Deiseanna fostaíochta
• Cúrsaí traenála
• Tacaíochtaí airgeadais
• Roghanna eile a bhféadfadh fostaíocht a bheith mar thoradh orthu.

Má tá íocaíocht cuardaitheora poist á fáil agat, gheobhaidh tú coinní leanúnacha chun monatóireacht a dhéanamh ar do dhul chun cinn i dtreo fostaíochta, oiliúna, nó oideachais.

Suíomh greasáin Jobs Ireland

Liostaíonn suíomh greasáin Jobs Ireland seo a leanas:

• Poist atá ar fáil in Éirinn agus thar lear
• Intéirneachtí
• Folúntais clár fostaíochta.

Tá comhairle ar shuíomh gréasáin Jobs Ireland freisin maidir le do CV a ullmhú, chomh maith le litir chlúdaigh a scríobh, foirm iarratais a chomhlánú, agus ullmhú don agallamh.

Chun rochtain a fháil ar an tseirbhís iomlán , caithfidh tú cuntas Jobs Ireland a chruthú ag baint úsáid as do MyGovID bunúsach.

Nuair a bheidh tú cláraithe, is féidir leat do CV a uaslódáil chuig bunachar sonraí Jobs Ireland, ionas gur féidir le fostóirí rochtain a fháil air agus teagmháil a dhéanamh leat go díreach.

Clubanna Fostaíochta

Reáchtálann an Roinn Coimirce Sóisialaí Clubanna Fostaíochtachun tacú le cuardaitheoirí poist trí sheirbhís buail isteach agus ceardlanna foirmiúla.

Ag Club Fostaíochta, is féidir leat:

• Faigh cabhair le do CV agus litreacha clúdaigh a ullmhú
• Faigh cabhair ag ullmhú don agallamh
• Forbair ‘plean gníomhaíochta fostaíochta’ aonair
• Faigh rochtain ar sheirbhísí gutháin agus idirlín chun cabhrú leat le cuardach poist
• Faigh eolas cothrom le dáta ar an ngeilleagar áitiúil agus deiseanna fostaíochta
• Labhair le fostóirí ionchasacha.

Ba chóir duit teagmháil a dhéanamh le d’Ionad Intreo áitiúil chun tuilleadh eolais a fháil ar Chlubanna Fostaíochta.

Meastóir Sochar Oibre

Is féidir leat an meastóir sochair oibre a úsáid ar MyWelfare.ie chun a fheiceáil conas a d’fhéadfadh dul i bhfeidhm ar d’íocaíocht leasa shóisialaigh tosú ar obair nó méadú a dhéanamh ar d’uaireanta.

Ríomhann sé an méid iomlán a gheofá dá nglacann tú le hobair lánaimseartha (lena n-áirítear aon Íocaíocht Teaghlach Oibre), agus cuireann sé é seo i gcomparáid leis an méid atá á fháil agat in íocaíochtaí cuardaitheora poist (Forlíonadh Cíosa san áireamh).

Tairseach EURES

Is féidir leat faisnéis a fháil ar dheiseanna fostaíochta ar fud na hEorpa trí úsáid a bhaint as tairseach EURES (Seirbhísí Fostaíochta Eorpacha).

Faisnéis Do Shaoránaigh

Is féidir leat léamh ár leathanaigh fresin faoi:

• Íocaíochtaí do dhaoine dífhostaithe
• Scéimeanna tacaíochta fostaíochta
• Ag éirí féinfhostaithe
• Ag filleadh ar oideachas agus oiliúint
• Tacaíochtaí fostaíochta do dhaoine faoi mhíchumas.

Má tá íocaíocht cuardaitheora poist á fáil agat, b’fhéidir go mbeidh ort páirt a ghlacadh i gclár gníomhachtaithe.

Déanann an RCS cur síos ar ghníomhachtú amhail oibriú le cuardaitheoirí poist chun tacú leo filleadh ar an bhfostaíocht. Bíonn súil leis go nglacann cuardaitheoirí poist páirt iomlán agus na tacaíochtaí a úsáid a chuirtear ar fáil i rith an phróisis ghníomhachtaithe. Is féidir a áireamh leis seo scéimeanna oideachais nó oiliúna nó scéimeanna tacaíochta fostaíochta chun cabhrú leat filleadh ar an ionad oibre nó ar thacaíochtaí eile.

Is féidir a n-íocaíocht cuardaitheora poist a laghdú mura nglacann daoine páirt sa phróiseas gníomhachtaithe agus is féidir iad a dhícháiliú ina dhiaidh sin óna n-íocaíocht ar feadh a fhaide le 9 seachtaine.

B’fhéidir nach mbeidh ar chuardaitheoirí poist atá níos sine ná 62 bliain d’aois páirt a ghlacadh sa phróiseas gníomhachtaithe.

Is féidir níos mó a léamh faoi na choinníollacha a bhaineann le d’íocaíocht cuardaitheora poist.

Clár gníomhachtaithe fostaíochta é JobPath atá in ainm is cabhrú le cuardaitheoirí poist fostaíocht lánaimseartha a aimsiú agus a choimeád.

An féidir liom iarratas a dhéanamh ar JobPath?

Roghnaíonn an RCS cliaint do JobPath ar bhonn randamach. Ní féidir leat iarratas a dhéanamh chun páirt a ghlacadh in JobPath.

Má chaith tú bliain ar JobPath agus má fhanann tú dífhostaithe 2 mhí tar éis duit críochnú, beidh tú incháilithe le haghaidh roghnúcháin arís.

Cad a tharlóidh má roghnaítear mé?

Má roghnaítear do JobPath, atreorófar thú chuig cuideachta JobPath

Tá dhá chuideachta ann

1. Seetec
2. Turas Nua.

Sannfar comhairleoir pearsanta duit a dhéanfaidh measúnú ar do scileanna, taithí oibre agus spriocanna oibre.

Cuirfidh an comhairleoir Plean um Dhul chun Cinn Pearsanta le chéile leat. Beidh sraith gníomhaíochtaí agus gníomhartha sa Phlean atá ceaptha cabhrú leat post a fháil.

• Taithí oibre
• Oiliúint
• Tacaíochtaí ábhartha eile

Cuirfear comhairle gairm bheatha ort agus cabhrófar leat le scileanna CV agus agallaimh. Is féidir leat tacaíocht agus comhairle a fháil freisin faoi do ghnólacht féin a thosú.

An féidir liom m’íocaíocht cuardaitheora poist a choinneáil?

Coimeádann tú d’íocaíocht chuardaitheora fad a bhíonn páirt á glacadh agat in JobPath.

Má tá tú cláraithe le Jobpath, is féidir leat iarratas a dhéanamh ar scéimeanna tacaíochta fostaíochta ar nós Tús nó Fostaíocht Pobail.

Ag brath ar d’Ionad Intreo, ní gá duit síniú chomh minic céanna chun d’íocaíocht chuardaitheora poist a fháil fad a bhíonn tú rannpháirteach in JobPath agus, i roinnt cásanna, b’fhéidir nach mbeidh ort síniú in aon chor.

Cad a tharlóidh má fhaighim post?

Is féidir leis an gclár maireachtáil ar feadh a fhaide le bliain (52 seachtain)

Má aimsíonn tú post, leanfaidh cuideachta JobPath le hoibriú leat fad a bhíonn tú fostaithe ar feadh a fhaide le bliain. Cuirfidh sé tacaíocht ar leith ar fáil duit i rith na chéad chúpla seachtain de d’fhostaíocht.

Tá tuilleadh eolais ar fáil ag JobPath ar gov.ie

Faigh amach faoi na híocaíochtaí atá ar fáil do dhaoine dífhostaithe.

Léigh Treoir Intreo ar Sheirbhísí agus Tacaíochtaí Fostaíochta (pdf).

Is féidir leat dul i dteagmháil freisin le d’ionad áitiúil Intreo nó le d’oifig bhrainse áitiúil chun eolas a fháil ar thacaíochtaí fostaíochta agus ar fholúntais.

Má theastaíonn cabhair uait chun do theidlíochtaí a thuiscint, is féidir leat teagmháil a dhéanamh le d’Ionad áitiúil um Fhaisnéis do Shaoránaigh.