Fianaise chlostráchta

Nuair a bhíonn fianaise á tabhairt i gcúirt ag finné, ní féidir leo úsáid a bhaint as an méid a dúirt duine eile mar fhianaise. Tugtar clostrácht air seo. Caithfidh an chúirt éisteacht leis an duine féin le caitheamh leis mar fhianaise. Mar shampla, más finné i dtriail thú, ní féidir leat an fhianaise seo a leanas a thabhairt, “Dúirt mo mháthair liom go bhfaca sí an cúisí ag 3pm".

Fianaise é seo i leith ráiteas a rinneadh lasmuigh den chúirt agus is clostrácht é. Chun go bhféadfaí an fhianaise sin a thabhairt isteach, bheadh ar do mháthair bheith ina finné agus cur síos a dhéanamh í féin ar an méid a chonaic sí.

Is í an riail ghinearálta nach féidir glacadh le fianaise chlostráchta i gcúirt. Má tá tú fianaise á tabhairt agat agus má thosaíonn tú le rud éigin a rá arb ionann agus fianaise chlostráchta é, is féidir le duine de na daoine sa chás nó leis an mbreitheamh cur isteach ort agus iarraidh ort stopadh.

Ní clostrácht a bhíonn i gceist le gach ráiteas a rinneadh lasmuigh den chúirt. Mar shampla, má mhaíonn cúisí nach féidir leo labhairt, is féidir leat fianaise a thabhairt go bhfaca tú agus gur chuala tú iad agus “Teastaíonn uachtar reoite uaim” á rá acu. Níl an fhianaise seo á tabhairt isteach lena chruthú gur theastaigh uachtar reoite ón gcúisí, ach lena chruthú gur féidir leo labhairt. Tá sé incheadaithe ar an gcúis sin.

Is í an eisceacht is tábhachtaí ar riail an chlostráchta ná fianaise admhála. Glactar leis, de ghnáth, nach ndéanfadh duine ráiteas a thagann salach ar a leas féin, agus caithfidh go bhfuil an ráiteas fíor ar an ábhar sin. Ciallaíonn seo gur féidir leat fianaise a thabhairt go ndúirt an cúisí leat ar an lá a fuair an t-íospartach bás, “Rinne mé é. Mharaigh mé é.” B’fhianaise chlostráchta é seo de ghnáth mar gheall gur ráiteas é a rinneadh lasmuigh den chúirt agus gur tugadh isteach é lena chruthú gur mharaigh an cúisí an té a fuair bás. Mar gheall gurb eisceacht ar riail an chlostráchta iad admhálacha, áfach, is féidir glacadh leis an bhfianaise sin i gcúirt.

Ba cheart duit comhairle dlí a fháil chun teacht ar fhaisnéis níos mionsonraithe air seo.