Uasghráduithe fuinnimh in aisce (Scéim Tithe Níos Teo)

Soláthraíonn Údarás Fuinnimh Inmharthana na hÉireann (SEAI) uasghrádú fuinnimh tí saor in aisce d’úinéirí tí a fhaigheann íocaíochtaí leasa shóisialaigh áirithe. Cuidíonn an obair uasghrádaithe seo chun éifeachtúlacht fuinnimh agus teas do thí a fheabhsú, agus tugtar an Scéim um Thithe Níos Teo orthu freisin.

Tugann an scéim tús áite do na tithe is sine agus is lú éifeachtúlachta ó thaobh fuinnimh de. Is féidir iarratas a dhéanamh an athuair ar obair uasghrádaithe saor in aisce má tá obair déanta agat cheana féin faoin scéim, sa chás go gcuirfeadh tuilleadh oibre uasghrádaithe leis an teach. Chun teacht ar an scéim arís, ní mór duit fós na critéir cháilitheacha a chomhlíonadh.

Mura gcáilíonn tú don obair uasghrádaithe saor in aisce, cuireann an SEAI deontais eile ar fáil chun cabhrú leis an gcostas a bhaineann le huasghrádú a dhéanamh ar éifeachtúlacht fuinnimh do thí. Cuireann an Scéim Náisiúnta um Fhuinneamh Baile a Uasghrádú deontais ar fáil chun do theach a ardú go rátáil éifeachtúlachta fuinnimh B2 nó níos airde, agus leas á bhaint as cuideachta phríobháideach chun an obair a bhainistiú. Nó, is féidir  deontais aonair um uasghrádú fuinnimh a fháil, mura dteastaíonn uait ach obair uasghrádaithe áirithe a dhéanamh, agus b'fhearr leat an próiseas a bhainistiú tú féin.

Cumhdaítear na huasghráduithe fuinnimh seo a leanas sa scéim:

• An t-áiléar a insliú
• Ballaí a insliú - insliú cuasbhallaí, ballaí inmheánacha agus ballaí seachtraí
• D’áit chónaithe a dhéanamh díonmhar ar shéideáin
• Seaicéid fálaithe
• Soilsiú atá tíosach ar fhuinneamh
• Comhairle faoi fhuinneamh

Cumhdaítear córais téimh lárnaigh nua agus fuinneoga ionaid faoin scéim freisin, amanna. Ní athsholáthrófar d’fhuinneoga ach má bhíonn do bhallaí á n-insliú ag an tráth céanna agus más fuinneoga aonghloinithe iad na fuinneoga atá ann cheana. Déanann an SEAI cinneadh an dteastaíonn nó nach dteastaíonn fuinneoga ionaid ar bhonn cás ar chás.

Chun cáiliú don scéim seo, caithfidh tú na critéir seo a shásamh:

• Caithfidh do theach féin a bheith agat agus caithfidh go bhfuil tú ag cónaí ann.
• Caithfidh gur tógadh agus gur áitíodh do theach roimh 2006
• Caithfidh nach ndearnadh obair ar an teach cheana féin faoin scéim (is féidir na critéir seo a athbhreithniú amach anseo)
• Caithfidh go bhfuil ceann de na híocaíochtaí leasa shóisialaigh seo a leanas á fháil agat:
• Liúntas Breosla mar chuid den Scéim Breosla Náisiúnta
• Íocaíocht Teaghlaigh Oibre
• Liúntas Cuardaitheora Poist a bheith á fháil agat ar feadh breis agus 6 mhí agus má bhíonn leanbh agat atá níos óige ná 7 mbliana d’aois
• Liúntas Cúraim Baile
• Íocaíocht Teaghlaigh Aontuismitheora
• Liúntas Cúramóra agus caithfidh go gcónaíonn tú leis an duine a dtugann tú cúram dóibh

Nóta: Mura bhfuil Rátáil Fuinnimh Foirgnimh (RFF) agat do do theach, déanfaidh an SEAI RFF saor in aisce lena chinntiú go gcomhlíonann do theach na critéir cháilitheacha chun RFF C nó níos ísle a bheith agat.

Tá 4 chéim sa scéim seo:

1.Déanann tú iarratas ar an scéim, agus cinntíonn tú go sásaíonn tú na critéir cháilitheacha thuas

2.Déanann suirbhéir an SEAI seiceáil ar do theach lena chinntiú go bhfuil sé oiriúnach do na hoibreacha

3.Déanann conraitheoir a cheapann an SEAI na hoibreacha

4.Déanann an SEAI measúnú ar na hoibreacha a rinneadh

Conas iarratas a dhéanamh

Má shásaíonn tú na critéir cháilitheacha, ba cheart duit an fhoirm iarratais a líonadh. Is féidir leat é a íoslódáil ó láithreán gréasáin an SEAI nó teagmháil a dhéanamh leo lena iarraidh go seoltar sa phost chugat é.

Beidh ort fianaise a sholáthar go gcáilíonn tú don scéim. Má cháilíonn tú don scéim toisc go bhfuil Liúntas do Chúramóirí á fháil agat, ní mór duit Foirm Dhearbhaithe an Liúntais do Chúramóirí (pdf) a chomhlánú. Má tá ceann de na híocaíochtaí cáilitheacha eile á bhfáil agat, beidh ar an Roinn Coimirce Sóisialaí an chuid ábhartha den fhoirm iarratais a chomhlánú. Teastaíonn sonraí iomlána faoin eolas ar an bhfoirm iarratais. Is féidir leat an fhoirm líonta agus na cáipéisí tacaíochta riachtanacha a sheoladh ar ríomhphost nó sa phost chuig an SEAI.

Is féidir eolas a fháil faoin scéim, chomh maith le treoirlínte chun an fhoirm iarratais a chomhlánú i dTreoirlínte um Scéim agus Iarratas SEAI (pdf).

Is gnách go nglacann an próiseas ó iarratas a dhéanamh go dtí go gcríochnaítear na hoibreacha idir 18 agus 24 mí, ach d’fhéadfadh seo a bheith éagsúil.

An bhfuil mo theach oiriúnach?

Déanfaidh an SEAI athbhreithniú ar d’iarratas agus má tá tú incháilithe don scéim, déanfaidh siad measúnú ar cibé acu an bhfuil nó nach bhfuil do theach oiriúnach don obair. Socróidh suirbhéir a ghníomhaíonn don SEAI cuairt a thabhairt ar do theach chun seo a dhéanamh. Déanfaidh siad suirbhé ar do theach, ina ndéanfar an méid seo a leanas:

• Siúl timpeall taobh istigh agus taobh amuigh de do theach, an t-áiléar san áireamh
• Measúnú a dhéanamh ar oiriúnacht fhoriomlán do thí d’uasghráduithe éifeachtúlachta fuinnimh
• Eolas a thomhas, a chur i dtaifead agus grianghraf a ghlacadh d’eolas faoi do theach
• A dtorthaí a phlé leat agus aon cheisteanna a d’fhéadfadh bheith agat a fhreagairt

An obair a dhéanamh

Má cháilítear thú don scéim agus má tá do theach oiriúnach, ceapfaidh an SEAI conraitheoir chun an obair a dhéanamh ar do theach.

Tabharfaidh an conraitheoir cuairt ar do theach chun measúnú a dhéanamh ar na hoibreacha a theastaíonn. Míneoidh siad ansin a gcuid moltaí duit, agus déanfaidh siad comhaontú ar sceideal don obair. Ba cheart go mbeadh conradh scríofa agat leis an gconraitheoir, ina luaitear go soiléir an obair ar chomhaontaigh tú leis.

Tar éis go ndearnadh an obair

Nuair a bhíonn an obair críochnaithe, tabharfaidh an conraitheoir cáipéisíocht duit faoin obair, aon bharántais san áireamh. Is tábhachtach iad seo a choimeád sábháilte, mar gheall go bhféadfaidís a bheith ag teastáil uait amach anseo.

Tugtar faoi Rátáil Fuinnimh Foirgnimh (BER) ar gach teach tar éis go ndearnadh na hoibreacha chun measúnú a dhéanamh ar fheidhmíocht fuinnimh an fhoirgnimh. Seolfar deimhniú BER agus tuairisc chomhairleach chuig an úinéir tí agus foilseofar é freisin ar chlár BER náisiúnta an SEAI.

Déanfar cigireacht ar roinnt tithe lena chinntiú go sásaíonn na hoibreacha na caighdeáin riachtanacha.

Ní ghearrfar aon chostas ort as obair a rinneadh faoin Scéim Fuinneamh Níos Fearr, Tithe Níos Teo.