Achomharc a dhéanamh chuig an gCúirt Oibreachais

Faoin Acht um Chaidreamh san Áit Oibre, 2015, is í an Chúirt Oibreachais an comhlacht achomhairc do gach achomharc a bhaineann le caidreamh san ionad oibre.

Féadfaidh tú achomharc a dhéanamh i gcoinne cinntí a rinne breithneoir de chuid an Choimisiúin um Chaidreamh san Áit Oibre (an CCÁO).

Caithfidh breithneoir an CCÁO éisteacht le do chás ar dtús. Féadfaidh tú achomharc a dhéanamh ar chinneadh an bhreithneora chuig an gCúirt Oibreachais.

Is í an teorainn ama chun achomharc a dhéanamh ná 42 lá i ndiaidh dháta chinneadh an CCÁO.

Is féidir an teorainn ama seo a shíneadh má tá an Chúirt Oibreachais sásta gur chúinsí eisceachtúla ba chúis leis an moill.

Féadfaidh an Chúirt Oibreachais cinneadh a dhéanamh déileáil le gearán nó díospóid trí aighneachtaí scríofa amháin. Is féidir le ceachtar páirtí cur ina aghaidh seo ach caithfidh siad agóid a dhéanamh laistigh de 42 lá tar éis gur cuireadh ar an eolas iad.

Ní gá go mbeadh ionadaíocht agat ag an gCúirt Oibreachais.

Más mian leat, is féidir duine a bheith leat agus ionadaíocht a bheith agat ag an éisteacht trí:

• Oifigeach ó cheardchumann
• Oifigeach ó chomhlacht a dhéanann ionadaíocht do leasanna fostóirí
• Abhcóide nó aturnae atá ag cleachtadh
• Tuismitheoir nó caomhnóir, má tá tú níos óige ná 18 mbliana d’aois (chomh maith le duine de na daoine a liostaítear thuas)
• Aon duine eile le cead ón gCúirt Oibreachais

Mura bhfuil ionadaí i láthair ag do chás, cinnteoidh an Chúirt Oibreachais nach mbeidh tú faoi mhíbhuntáiste mar thoradh ar sin.

Cad a tharlaíonn ag an éisteacht?

Bíonn éisteachtaí na Cúirte Oibreachais maidir le hachomhairc ar siúl go poiblí ach amháin nuair a chineann an Chúirt Oibreachais gur chóir iad a chur ar siúl go príobháideach (nó príobháideach i bpáirt) mar gheall ar imthosca speisialta.

Tá cumhachtaí leathana ag an gCúirt Oibreachais a cheanglaíonn ar fhinnéithe freastal agus fianaise a thógáil faoi mhionn.

Féadfaidh an Chúirt Oibreachais ceist dlí a eascraíonn san achomharc a chur faoi bhráid na hArd-Chúirte. Is cinneadh críochnaitheach dochloíte é cinneadh na hArd-Chúirte.

Má bhuann tú do chás, tugtar 42 lá do d’fhostóir cinneadh na Cúirte Oibreachais a chur i bhfeidhm.

Má fhaigheann tú cúiteamh

Caithfidh d’fhostóir ordú a chomhlíonadh a ordaíonn iad cúiteamh a íoc leat. Tá cion á dhéanamh ag fostóir a dteipeann orthu ordú a shásamh, murach gur féidir leo a thaispeáint nach raibh ar a gcumas an íocaíocht a dhéanamh mar gheall ar chúinsí airgeadais.

Mura gcomhlíonann d’fhostóir

Mura gcuireann an fostóir cinneadh na Cúirte Oibreachais i bhfeidhm laistigh de 42 lá, is féidir leat iarratas a dhéanamh leis an gCúirt Dúiche ar ordú a ordaíonn iad amhlaidh a dhéanamh. Is féidir leis an gCoimisiún um Chaidreamh Coimisiún nó do cheardchumann nó comhlacht eiscthe eile iarratas a dhéanamh freisin leis an gCúirt Dúiche ar ordú thar do cheann. Is ionann comhlacht eiscthe agus comhlacht a dhéanann ionadaíocht do leasanna grúpa áirithe oibrithe (mar shampla, fóram inmheánach fostaithe a dhéanann idirbheartaíocht ar théarmaí fostaíochta le fostóir).

Caithfidh an Chúirt Dúiche an t-ordú a dheonú. Má tá cúiteamh le híoc leat, is féidir leis an gCúirt Dúiche a ordú freisin go n-íoctar ús.

I bhformhór na gcásanna, is féidir le ceachtar páirtí an cinneadh a achomharc leis an Ard-Chúirt ach amháin ar phointe dlí.

Arís eile, is cinneadh críochnaitheach dochloíte é cinneadh na hArd-Chúirte.

Chun achomharc a dhéanamh ar chinneadh breithneora chuig an Chúirt Oibreachais baintear úsáid as foirm achomhairc na Cúirte Oibreachais (pdf). Caithfidh tú achomharc a dhéanamh laistigh de 42 lá ó dháta an chinnidh.

Tá eolas breise ar fáil faoi achomharc a dhéanamh ar workplacerelations.ie.