Seirbhísí cúram leanaí ar aois scoile a rialáil
Cúram leanaí ar aois scoile
Soláthraíonn seirbhísí cúraim leanaí ar aois scoile cúram leanaí lasmuigh d’uaireanta scoile do leanaí atá ar scoil agus atá níos óige ná 15 bliana d’aois. Áirítear leis seirbhísí luathbhlianta, naíolann lae, naíolann agus cúram lae.
Caithfidh seirbhísí cúraim leanaí do leanaí ar aois scoile na rudaí seo a leanas a dhéanamh:
- Clárú leis an nGníomhaireacht um Leanaí agus an Teaghlach (Tusla) sula gcuirtear aon seirbhísí ar fáil
- Caighdeáin sláinte, sábháilteachta agus leasa a chomhlíonadh a leagtar amach i Rialacháin an Achta um Chúram Leanaí, 1991 (Seirbhísí Luathbhlianta) (Seirbhísí Aoise Scoile a Chlárú), 2018 (pdf) a chomhlíonadh.
Tá Tusla – an Ghníomhaireacht um Leanaí agus an Teaghlach – freagrach as cigireacht agus clárú a dhéanamh ar na seirbhísí cúraim leanaí go léir, leanaí réamhscoile agus leanaí ar aois scoile san áireamh.
Is féidir le tuismitheoirí an clár seirbhísí cúraim leanaí ar aois scoile a sheiceáil.
Seirbhísí cúraim leanaí ar aois scoile a chlárú
Caithfidh soláthraithe cúraim leanaí ar aois scoile a bheith cláraithe le Tusla. Má chuireann soláthraí seirbhísí do leanaí ar aois scoile agus leanaí réamhscoile ar tairiscint, caithfidh siad a bheith cláraithe le gach seirbhís a sholáthar.
Caithfidh aon seirbhís nua clárú le Tusla 3 mhí sula n-osclaíonn siad an tseirbhís ar aois scoile. Is féidir leat súil a chaitheamh ar an gclár seirbhísí cúraim leanaí ar aois scoile.
Cé ar gá dó clárú le Tusla agus na Rialacháin a chomhlíonadh?
Is iad na soláthraithe cúraim leanaí atá cumhdaithe ag na Rialacháin ar gá dóibh clárú:
- Seirbhísí cúraim leanaí atá bunaithe in ionad
- Seirbhís feighlíochta leanaí
Cé nach gá dóibh clárú le Tusla?
I measc na soláthraithe cúraim leanaí atá díolmhaithe ó na Rialacháin, tá iad seo a leanas:
- Gaol leis an leanbh nó céile an ghaoil siúd (is é sin, deartháir, deirfiúr, aintín, uncail, seantuismitheoir nó leastuismitheoir an linbh)
- Feighlí leanaí a chuireann cúram ar fáil do 6 leanbh, ar a mhéid, (seachas a leanaí féin) ag an am céanna. Ní féidir le breis agus triúr de na leanaí a bheith ar aois réamhscoile.
- Seirbhísí cúraim leanaí in ionaid buail isteach. Ionaid iad seo a chuireann cúram ócáideach ar fáil do leanaí
- Seirbhísí sealadacha cúraim leanaí ar aois scoile
Réamhchlárúchán
Caithfidh gach seirbhís athchlárú le Tusla gach 3 bliana, agus déanfaidh Tusla cigireacht orthu i rith an ama sin.
Deimhniú clárúcháin
Caithfidh gach seirbhís cúraim leanaí deimhniú clárúcháin a thaispeáint in áit fheiceálach ina suíomh cúraim leanaí ón 31 Eanáir 2023.
Rialacháin agus CigireachtaíCúraim Leanaí ar Aois Scoile
Cumhdaítear roinnt limistéar sna Rialacháin do sholáthraithe cúraim leanaí.
Sláinte, leas agus forbairt an linbh
Caithfidh soláthraithe cúraim leanaí sláinte, sábháilteacht agus leas leanaí a fhreastalaíonn ar a seirbhís a chosaint. Caithfear na caighdeáin a leagtar amach sna Rialacháin (pdf) a bheith i bhfeidhm sular féidir seirbhísí cúraim leanaí a sholáthar do leanaí. Áirítear le roinnt de na limistéir a chumhdaítear sna Rialacháin:
Bainistíocht agus soláthair foirne
Caithfidh seirbhís chúram leanaí a chinntiú go ndéantar maoirseacht chuí ar leanaí ag gach tráth.
Caithfear grinnfhiosrúchán an Gharda Síochána a dhéanamh ar an bhfoireann, na scoláirí agus na hoibrithe deonacha go léir a bhfuil rochtain ar leanbh acu. Caithfear Grinnfhiosrúchán an Gharda Síochána a dhéanamh freisin ar fheighlithe leanaí (seachas iad siúd atá díolmhaithe ó chlárú – féach thuas).
Caithfidh duine eile a bheith ar fáil ag gach tráth ag gach seirbhís cúraim leanaí chláraithe chun cabhair a thabhairt i gcás éigeandála.
Cóimheasa leanaí luathbhlianta a cheadaítear i seirbhísí ionadbhunaithe
Caithfidh seirbhísí ionadbhunaithe a chinntiú go bhfuil cóimheas íosta 1 duine fásta i measc 12 leanbh ar aois scoile ann ag gach tráth.
Cóimheasa leanaí luathbhlianta a cheadaítear i seirbhísí feighlíochta leanaí
Tá teorainn ar an líon uasta leanaí ar féidir leo freastal ar sheirbhís feighlíochta leanaí ag an am céanna.
Caithfidh seirbhís feighlíochta leanaí a thugann cúram do leanaí réamhscoile agus ar aois scoile araon cloí le cóimheasa diana a bhaineann le leanaí atá i gcúram ag an am céanna.
| An líon leanaí ar féidir cúram a thabhairt dóibh i seirbhís feighlíochta leanaí | |
| Líon na leanaí réamhscoile a bhfuil cúram á thabhairt dóibh | Líon uasta na leanaí ar aois scoile |
| 0 | 12 |
| 1 | 10 |
| 2 | 7 |
| 3 | 5 |
| 4 | 2 |
| 5 | 1 |
Bainistiú iompraíochta
Ba cheart go mbeadh beartais agus nósanna imeachta scríofa ag an soláthraí chun iompar dúshlánach agus bulaíocht a bhainistiú.
Áitreabh
Caithfidh seirbhísí cúraim leanaí (feighlithe leanaí ina measc) a chinntiú go mbaineann a n-áitreabh caighdeáin áirithe amach. Caithfidh teacht a bheith ag leanaí ar spás taobh amuigh ar bhonn laethúil, cé acu ar an áitreabh nó i spás eile taobh amuigh.
Eolas do thuismitheoirí
Caithfear eolas a thabhairt duit faoin tseirbhís, sonraí an duine i gceannas agus na foirne eile, na cóimheasa idir daoine fásta/leanaí, raon aoise na leanaí, an saghas cúraim, saoráidí, uaireanta oscailte agus táillí san áireamh.
Bearta sábháilteachta
Caithfidh beartais a bheith ag soláthraithe cláraithe maidir le cógas a riar, rialú ionfhabhtuithe, sábháilteacht ó dhóiteán agus leanaí a fhágáil agus a bhailiú.
Árachas
Caithfidh cumhdach leordhóthanach árachais a bheith i bhfeidhm ag soláthraithe cúram leanaí do leanaí ina gcúram.
Gearáin
Caithfidh beartas gearán ag seirbhísí cláraithe chun gearáin a chur i dtaifead agus chun déileáil le gearáin faoin tseirbhís. Caithfear tuismitheoirí a chur ar an eolas ar an mbeartas.
Eolas breise
Má theastaíonn eolas breise uait faoi chaighdeáin agus rialáil seirbhísí cúraim leanaí do leanaí i do cheantar, ba cheart duit teagmháil a dhéanamh leis an gcigire luathbhlianta.
Má theastaíonn eolas uait faoi sheirbhísí cúraim leanaí áitiúla agus saincheisteanna eile a bhaineann le cúram leanaí óga, ba cheart duit teagmháil a dhéanamh le do Choiste Contae/Cathrach i gCúram Leanaí áitiúil (CCLCC).
Tugtar eolas sa chlár seirbhísí cúraim leanaí ar aois scoile (pdf), ainm an tsoláthraí, próifíl aoise na leanaí, próifíl aoise na leanaí agus an líon leanaí ar féidir leis an tseirbhís freastal orthu san áireamh.
Is féidir le soláthraithe seirbhíse teacht ar eolas breise faoi sheirbhís ar aois scoile a chlárú agus a athchlárú.
D’fhoilsigh an Roinn Leanaí, Comhionannais, Míchumais, Imeasctha agus Óige (an RLCMLÓ) plean gníomhaíochta ar chúram leanaí ar aois scoile freisin.